За време на менопаузата, жените кои јадат многу слатка храна и преработени житарки имаат поголема веројатност да страдаат од несоница, покажа едно американско истражување.
Голема американска студија која опфати жени во менопауза во средината на шеесеттите години покажа дека диететскиот гликемиски индекс директно влијае на проблемот со несоницата.
Жените со највисок гликемиски индекс во исхраната, што значи дека јаделе најмногу јаглени хидрати во форма на бел леб, слатки и засладени пијалоци, имале 11 отсто поголеми шанси за несоница од жените кои имале најнизок индекс.
Несоницата е уште една добра причина да се избегнуваат слатките и состојките со шеќер, освен контролата на тежината – наведуваат научниците на ова истражување.
Кога шеќерот во крвта брзо скока, телото реагира со ослободување на инсулин. Последователниот пад на нивото на шеќер во крвта може да доведе до скок на хормоните како што се адреналин и кортизол, што може да влијае на сонот.
Несоницата непропорционално ги погодува жените, покажа студијата чии резултати беа објавени во американскиот весник за клиничка исхрана.
Студијата покажа дека жените кои јаделе повеќе зеленчук, влакна и свежи парчиња овошје, наместо сокови, имаат помали шанси да развијат нарушувања на спиењето и несоница.
Иако целото овошје содржи шеќер, тие исто така содржат влакна, кои помагаат да се минимизираат скоковите на шеќерот во крвта, поради што овошјето има понизок гликемиски индекс.
