Здравиот начин на живот, урамнотежената и целосна диета и физичката активност се основа да се чувствувате добро физички, да бидете здрави, енергични и во добра форма. Ако се чувствуваме добро во нашата „кожа“, ова секогаш влијае на нашата целокупна фигура и изглед, како и на нашиот позитивен поглед кон животот.
Постојаните диети и ограничувања го лишуваат телото од важни микро и макронутриенти, покрај тоа, тие негативно влијаат на нашето расположение и тонус. Многу подобра опција е да се изградат здрави навики за исхрана, на кои треба да се придржуваме преку целата година, во комбинација со спорт и омилена физичка активност.
На овој начин ќе го ослободиме нашиот ум и тело од моментите кога ќе одлучиме да го измачуваме со строга диета или интензивен спорт одреден временски период, само за да постигнеме моментална форма. Потоа?
Жените, се разбира, се посуетен пол (иако во последниве години не е сигурно дека е така) и честопати „се залетуваат“ со сегашните диети и што уште не. Ова, како што рековме, го лишува телото од вредни хранливи материи.
Ние, жените, имаме поинаква хормонална средина од онаа на мажите, односно имаме специфични нутриционистички потреби, особено со напредување на возраста и појава на хормонална нерамнотежа. Присуството на одредена храна во нашето мени ги носи нивните здравствени придобивки и придонесува за физичката и менталната рамнотежа во здравјето на жените.
Здравата и урамнотежена исхрана е најдобриот начин да му се обезбедат на телото микро и макронутриенти што му се потребни. Меѓутоа, во брзото и стресно секојдневие во кое живееме, тоа не е секогаш можно.
Додатоците во исхраната можат да помогнат паралелно со нашата исхрана, се разбира, по консултација со нашиот лекар – пробиотици, витамин Ц и Д, калциум, рибино масло, глукозамин и колаген за здрави зглобови и тетиви. Во продолжение Ви предлагаме 5 здрави намирници кои секоја жена треба да ги консумира.
Зелен зеленчук – спанаќ, зелка, брокула, коприва, карфиол, бриселско зелје, разни салати … лиснатиот зеленчук е богат со сите важни витамини и минерали – магнезиум, калциум, фосфор, селен, калиум, витамини А, Ц, К , Е, фолна киселина и други. Исклучително се богати со хлорофил, кој според истражувањата е еден од најмоќните антиоксиданси познат на луѓето со силно детоксицирачко и регенерирачко дејство врз нашето тело.
Храна богата со фитоестрогени – со возраста и последователната хормонална нерамнотежа, храната богата со фитоестрогени ги ублажува симптомите поврзани со намаленото ниво на естроген во женското тело. Фитоестрогените се супстанции од растително потекло кои личат на естроген. Кога се најдат во организамот на жената, тие го компензираат недостатокот на овој важен хормон за здравјето на жените. Храната во која ги наоѓаме се ленено семе, мешунки, производи од соја – тофу, млеко од соја.
Мешунките – наут, леќа, грашок, грав – богати со протеини, влакна и витамини од групата Б. Го одржуваат стабилно нивото на шеќер во крвта, го намалуваат холестеролот, го подобруваат здравјето на цревата.
Протеин – Протеинот игра важна улога во нашето тело и во сите телесни ткива, затоа не треба да изостанува од нашата исхрана, особено ако редовно вежбате. По 35-40 години, мускулната маса постепено се намалува на сметка на маснотиите. Ова го деформира нашето тело и изгледаме опуштено. Редовната физичка активност и зголемениот внес на протеини (говедско, пилешко, јајца, риба, урда, мешунки, ореви, протеински шејкови) може значително да го забават губењето на мускулната маса и да го одржат нашето тело здраво и атлетско.
Храна што содржи здрави масти – авокадо, ореви, маслинки, маслиново масло, кокосово масло, омега-3 и омега-6 масни киселини. Омега-6 се наоѓаат главно во растителни масла, ореви и семиња. Омега -3 во мрсна морска риба – лосос, харинга, туна, исто така и во ленено семе, ореви. Овие масни киселини имаат бројни придобивки за здравјето на срцето, ја подобруваат состојбата на коските и зглобовите, видот, се борат со депресија и анксиозноста.
